a為進修同公司吵大鑊 (8.20)

翻開報紙，發現Twins的工作行程竟遍布全球，坐飛機的頻密度可媲美空中小姐。我與阿Sa（蔡卓妍）因合作拍咀戲而認識，原來她亦曾經迷茫過，亦同樣在唱歌事業上力求完美，她甚至為爭取時間進修音樂，而與公司開戰！

看Twins的演唱會，活像一個合家歡節目，不論小朋友、年輕人或父母級也同坐在觀眾席上揮手尖叫，普世歡騰如度聖誕。我作為表演嘉賓，在台上的時間雖然很短暫，但那種感染力，卻縈繞良久。

梁：梁詠琪　蔡：蔡卓妍

梁：個次做你哋演唱會嘉賓，真係好好玩，相比其他人嘅演唱會，又有另一番趣味。

蔡：我哋好多Fans都係小朋友，亦因為咁，無形間起到好正面嘅作用。依家啲後生成日掛住玩遊戲機，父母好難同佢哋溝通。去睇我哋嘅電影、演唱會，已經成為佐佢哋家庭樂嘅節目，大家可以有共通話題，好多時仲會有父母寫信添，話好開心Twins可以成為佢哋溝通嘅橋樑。

拍咀戲驚驚青青
梁：係電影合作過嘅女演員其實唔多，而你係其中一個……

蔡：《戀情告急》啊嘛！我仲咀你添！哈哈，當時其實好驚呀！

梁：係呀，兩個女仔拍咀戲係有啲怪，嘻嘻！

蔡：不過我每次拍咀戲都會緊張，我驚畀人覺得阿Sa原本唔識錫 ……

梁：哈哈！我就成日驚人會覺得我好猴擒、好渴！因為拍親熱戲一定要投入，而一投入就去得放，咁太放就怕人會覺得猴擒囉！

蔡：我以前聽人講拍咀戲前，又要食香口膠又要刷牙呀咁，所以我第一次拍親熱戲就做足晒，但係點知畀人笑！

梁：點解呀？呢啲禮貌黎架嘛！

蔡：原來其他人都冇做，個次Joe Ma（馬偉豪）仲話：「唉，你零舍多！」真係激死呀！哈哈！

梁：哦！拍Joe Ma嘅戲……等我估下係邊個冇刷牙先！

蔡：哈哈……

嫌組合名唔長青
梁：你可以話係拍港台劇集《Y2K》入行，但點解會組成Twins唱歌呢？

蔡：Mani囉！佢睇完《Y2K》，又見過我做兼職模特兒。有日影影相無喇喇Mani走上，我當時都唔知佢係邊個。跟住佢就叫我去試音，之後就發展，就係依家咁喇！

梁：軟硬再開番騷，有離有合令人極之感動，你有冇諗過去到三十幾四十歲時依然係Twins嘞？

蔡：哈哈，所以我一早就話個名改錯佐就係咁解囉！好似夢劇院、Echo等女子組合，到四、五十歲個名都好襟啊嘛！而Twins就好難長青，一係到時再加，比如Old Twins或Trees囉！哈哈。

混沌迷茫到狂喊
梁：其實我有個問題，每當我打開報紙，總會見到Twins今日飛北京，翌日去台灣，前晚又唔知去佐邊……你哋出道五年幾，一直都係咁忙？

蔡：係呀，搭飛機多過搭車，好辛苦，又有時差，有時起身都唔知自己係邊，以至好多時都混混沌沌咁！有時明明洗完頭，轉頭唔記得又洗過，一日可以洗幾次。曾有前輩同我講過，做藝人，總會有一個時期係迷茫期，所以係我入行嘅頭三年，我一度覺得無助。試過有一次，訓醒起身望住塊鏡，覺得好驚，忍唔住係咁喊，我望住塊鏡竟然唔知自己係邊個……我係蔡卓妍，Charlene，唔係阿Sa……

走音歌迷冇詐型
梁：我明白，因為入行後改變太大，就好似變成佐另一個人咁，我亦曾試過。當年只唱片銷量仲係講緊幾十萬，我第一次出國語唱片成功之後，人人捧到我好高。但其實會質疑自己，係咪真係做到人人所講嘅咁好呢！即使我演唱時走音，歌迷依然支持萬分，我就接受唔到。

蔡：因為佢哋心目中嘅走音，係真係離晒譜先為之走音。

梁：哈哈，即係話唔好破音就得喇！呢個就係我想講嘅，其實每次我都好想追求完美，即使一粒音平，我都會好　憎，但歌迷永遠講啲好好聽嘅說話，其實我覺得唔值。

蔡：我以前都有咁諗，但可能其他因素蓋過佐呢樣嘞，始終我同阿嬌唔係天生擁有一把靚聲，絕對需要後天努力。但係公司連一日時間都畀唔到我哋去進修，搭得飛機多把聲都會沙啦！仲要冇一個好功底，所以有次同公司嗌佐一場交，依家畀好多嘅時間我哋去增值自己。