Kenny阿Sa揭另一半秘史 (11.19)

蔡卓妍（阿Sa）與鍾欣桐（阿嬌）組成Twins，在六年間風靡萬千少男少女，而關智斌（Kenny）卻與張致（Steven）組成的Boy'z拆夥。兩隊組合雖有不同發展，但阿Sa與Kenny仍情如姊弟，行埋即大爆六年戰友阿嬌與Steven的秘史！

S：蔡卓妍 K：關智斌

Boy'z曾發生一件大新聞，傳聞Steven因拍拖影響工作，與Kenny鬧意見，兩兄弟更在髮型屋大打出手！被傳媒踢爆後，Kenny一句「嬲舊叉燒都唔嬲佢！」成佳話，原來這句說話是由Kenny智囊團想出來，獻計者包括阿Sa。

S：記得第一次見到你，係同我哋拍《眼紅紅》MV，我覺得你好女仔，眼大大又怕醜。

K：你哋係我嘅Friend嘅女神，導演叫我拖住你隻手，唔騰雞就假啦！MV出佐街後，好多Friend打問我同你「拍拖」有咩Feel！記得拍MV嗰 日，場地布置成一冷一熱兩部分，咁你就熱鬧邊，所以覺得你好活躍、好嘈，同班工作人員玩到癲晒。而阿嬌就好Cool，仲匿埋係個雪櫃旁唔出聲，好大 對比！

與Steven同住人生最黑暗

S：其實你咁鍾意整齊，但Steven份人咁亂，點夾呢？

K：所以同Steven一齊住嘅日子係我人生黑暗期，我間屋從未如此混亂過。佢份人好飄忽又自我，最初公司仲要我照顧佢，又扮佢表哥幫佢報學校讀書，點知佢唔返學，搞到學校晨早九點打電話摷醒我搵佢，激死！

S：記得你同佢打交嗰次好激，案件重演呀！

K：事情都過咁耐唔怕講，當年Boy'z踏入第二年，我好緊張成績。當日正值要Plug我首《情陷百老》，我好鍾意首歌，仲同公司度好晒宣傳計劃， 點知因為Steven私事，公司決定推翻晒全盤計劃，改Plug我獨唱《眼紅館》。結果某朝早睇報紙見Steven位朋友講，我髮型屋質問 佢，佢竟然話：「關我咩事？」我即刻火都，一拳打落佢塊面！

S：梗有人出黎拉住你哋兩個啦！然後「咩呀？」「想點呀？」一輪就冇事啦！Mani（經理人）有冇鬧你？

K：冇喎！事後我打畀Mani備案，佢竟然問：「！打佢塊面？搵食！點見人？」當晚我就同朋友去飲。

S：我記得我有份，仲好緊張圍埋諗點同記者講，有人就提議「嬲舊叉燒都唔嬲佢！」結果成為全城佳話，依家諗番個晚成班人好無聊，好好笑！咁你後來點樣同Steven和好？

K：男仔拳頭交好快冇事，雖然發生唔開心嘅事，但到真係拆夥時就唔捨得，始終同佢夾咁耐，摸熟晒佢脾性，知道幾時對佢用軟功，幾時出硬功。

S：依家見Steven係Sun Boy'z做組長，帶住William同埋Dennis出黎做嘢，個人成熟佐！

K：好多人都問我，公司係咪唔准拍拖？唔准去蒲？

S：梗係冇咁變態啦！但當你慢慢見到自己有成績，就會開始有責任感，唔想因為一次去夜蒲、去玩就斷送晒所有嘢。

2001年突然爆出一隊超人氣組合F4，橫掃整個亞洲，英皇有意照辦煮碗，將Kenny、Steven與三個男仔組成「港版花樣男孩」，又唱又跳，迷惑全城！可惜五個有四個唱得唔跳得，計劃被迫告吹。

處男舞笑爆嘴

K：我第一次見Steven係公司卡拉OK聚會，當晚畀老闆拉住介紹畀高層、名人認識，然後要我唱支歌跳舞表演，勁驚！見到Steven同鍾兆康入房，Steven同大家好似好熟咁，於是當老闆叫我唱歌，我就好冒昧咁叫埋佢陪我唱，壯膽！

S：公開唱歌唔驚，最驚係畀人上下打量嘅感覺，前面個個大人物，真係驚到腳仔軟。

K：後來公司見F4咁勁，亦想組隊五人男子組合，去到排舞室叫我跳舞，我之中只係Steven一個稍為有節拍感，其餘全部都唔跳得。仲記得有個舞步要手腳並用打橫走，結果我變五隻螃蟹，Mani笑到彎腰，眼淚水都標晒：「唔掂，唔好再跳！」

S：聽講你哋仲要做埋啲好骨痹動作……

K：係呀！要我哋用好情深嘅眼神，手指指住天好似畫流星咁，又要我哋排陣式，總之好命！

工作夥伴要感情好，才可以拍住上，但阿Sa與阿嬌、Kenny與Steven，在組成Twins及Boy'z前素未謀面，毫無感情。阿Sa坦言Twins成立了三年，她才將阿嬌這座冰山劈開。

兩生花姊妹情

S：阿嬌其實好慢熱，首次見佢係係Mani嘅卡拉OK約會，見佢好靚咪撩佢、同佢講：「你好面善喎！」點知佢一盆冷水向我照頭淋：「我哋未見過喎！」我 再問：「可能係你做Model時見過呢！」佢就話：「冇！我哋冇見過面。」後來發現同佢撞袋先打開到話題，仲約第二日去行街添！

K：我約女仔咁易就好囉！其實阿嬌表面好Cool，熟佐就知佢對朋友好有心。記得我好耐之前話鍾意佢條Tiffany頸鏈，佢揀佐條差唔多款頸鏈係我生日送畀我，令我好感動。

S：雖然我同阿嬌都好珍惜對方，但Twins最初兩三年感情唔深，因為每日對足廿個鐘都係工作，忙到唔想講其他嘢，加上認識得太淺，未知對方底線唔敢嗌 交。直至第三年公司突然放我哋幾日假，我哋偷偷去佐台灣玩。最難忘係酒店本想借DVD機睇《行運一條龍》，點知借錯佐投影機，搞完一輪冇牆放影要投係天花 板，我哋就訓係張床度睇戲，另外仲去機場放煙花、通宵傾偈，好開心，好難忘，之後我哋感情亦愈來愈好。