霍汶希誓帶Twins進軍荷里活 (12.03)

「多謝Mani！」這句話，蔡卓妍（阿Sa）不知說了多少遍，但看得出每次也出自真心。霍汶希（Mani）帶領Twins締造香港樂壇組合神話，同樣亦把 自己事業推至高峰，三人關係親密得像家人一樣。今次有機會訪問Mani，阿Sa亦毫不留情大逼供，事業、婚姻，甚至Twins的命運也無所不談，Mani 揚言暫不結婚，為的是要帶領Twins衝出亞洲。

憑着獨到的眼光，Mani多年來發掘了不少獨當一面的紅星，帶領旗下藝人將事業推向高峰的同時，亦把自己的事業推往最高位置，下一步她希望帶着阿Sa衝出亞洲，進軍荷里活！

妍：蔡卓妍　希：霍汶希

妍： Mani，依家你嘅事業已經去到咁高嘅位置，其實有冇諗過要再高啲？好似去到楊生（老闆楊受成）咁樣呢？

希： 我覺得依家已經去到人生嘅極限，精神壓力同身心都好疲累，所以我決定做番呢個位置就算喇！但我好希望將來帶你哋衝出亞洲！

妍： 咁我哋第一站會去邊度呀？

希： 梗係進軍荷里活啦！

妍： 荷里活？好驚呀！其實我野心好細咋！依家立足中、港、台我已經覺得OK喇！最緊要知足！其實你旗下咁多藝人，你覺得邊個最聰明同最靚呀？

梁洛施最靚女

希： 你唔可以話係最聰明嗰個，但係最聰明嗰班；而最靚係Isabella（梁洛施）同阿嬌（鍾欣桐）啦！如果揀五個嘅話，你都係其中一個。

妍： 咁最乖呢？（阿Sa露出奸笑，非常鬼馬！）

希： 你同Joey（容祖兒）囉！

妍： 好彩我有份！

一直渴望成為經理人的阿Sa，臨場接受Mani面試，但一個女性用品廣告差點把阿Sa嚇窒，幸好她最後還是順利過關，有望成為Mani接班人！

妍： 其實我一直希望將來可以做生意，或者好似Mani你咁樣做經理人。我好勤力！尋日又返公司幫手聽電話，又幫手發相畀傳媒。

希： 你咁想做，咁要即場面試。我依家就扮客人，你就負責聽電話接Job（工作）啦！

「喂，你好，我想搵阿Sa拍廣告！」

妍： 啊……咁請問係咩性質？

希： 係衛生巾廣告。

妍： 咁係會出幾耐？咁係咩牌子？

希： 一年。牌子係柔順翼。（Mani頭腦轉得非常快，即時作了個牌子）

妍： 咁樣，我要去Check清楚先，因為阿Sa之前好似拍過呢類型嘅廣告。

希： 啊？乜阿Sa拍過喇？咁我搵容祖兒啦！其實你哋公司仲有咩人呀？我都想搵男Artist拍呢個廣告喎！

妍： 男仔方面我哋有Kenny（關智斌）同埋Sun Boy'z。（眼見對方要求換人，阿Sa顯得有點口窒窒。）

希：Sun Boy'z？係咪三個紮紮跳隊呀？幾好喎！我覺得佢哋拍衛生巾廣告幾適合呀！（聽到這，阿Sa終忍不住笑了出來。）

妍： Mani，你扮嗰個客人係傻！

希： 哈，你依家先知咩？其實每日都有好多人打玩電話！你傾咗咁耐先知係自己時間囉！不過你嘅表現算係合格，有五十分，以你聰明才智，假以時日應該OK嘅！

女強人Mani慘被逼婚！阿Sa少女心事驚爬Mani頭，還說要做伴娘，但Mani即「耍手擰頭」，笑言怕她愈幫愈忙！

妍： 每次我去人哋個婚禮都覺得好感動，有時仲會眼濕濕添！不過我依家唔會諗結婚住喇！因為自己仲有好多嘢未做，Mani，你幾時結婚？到時我要做你伴娘！

希： 咪搞喇！人哋做伴娘要幫手拎婚紗、數金器，我怕你到時踩住我條裙，數金器又數少幾件，愈幫愈忙呀！不過唔係話結就結，依家唔係我阻止藝人結婚，係藝人阻止我結婚先！你哋全部都咁細，我點可以依家結呢？

妍： 我冇阻止你呀！成日都叫你結婚喇！我唔想爬你頭，咁不如你生仔先！

希： 我一定會結咗婚先生仔，但依家咁多嘢做，二十四小時都要做。你哋又成日激我，一陣有咪成日動胎氣！都係唔好住喇！等我日後真係轉行先諗啦！

妍： 咁如果畀你揀，我哋咁多個之中，你最想邊個嫁先？

希： 我諗會係Joey，因為佢比較自律，好清楚自己做緊乜，即使結咗婚都唔會影響到事業。其實依家嗰樂壇已經唔係話唔可以結婚，佢都好羨慕王菲，結咗婚都可以做自己鍾意嘅嘢。

後記：時辰未到

Twins入行已六個年頭，期間多次傳出拆夥消息，阿Sa心也曾擔心，訪問期間也忍不住問了Mani一句：「Twins壽命會有幾長？」Mani說：「要視乎市場，不過我知你哋好堅持唔想分開，再發展落去咪惟有變成男歌手，角逐男組合獎囉！哈！」