童年志願SaSa轉 (18.7.06)

三歲唔一定會定八十，阿Sa（蔡卓妍）唱歌跳舞演戲誇啦啦！天賦才華毋庸置疑，但自小性格則與現狀風馬牛不相及。由阿Sa靚妹時代無所事事，到紅簿仔發光再而在舞台上發熱發亮，今日，就由她的志願講起。

小時候媽媽問我：「將來大個想做咩呀？」「做律師！」我咬薯片答得毫不汗顏，當時電視正播《壹號皇庭》。後來醫生戲當道，《ER》、《妙手仁心》看得我心神恍惚，媽媽口痕又問起來：「阿Sa，大個後想做咩呀？」

我一邊看《ER》，劇情緊張，個心住住，答：「做醫生……」媽媽搖頭失笑。

「我的志願」，一直跟電視劇而變。

也有試過不受劇集影響的經歷，但只一次咁大把。

「媽咪媽咪，我大個女想做小巴司機！」我看乘客一個個把散銀叮叮噹噹放進錢箱，我看得大樂，媽媽坐在我身旁卻皺眉。

成績
2001年組成了Twins後，才一年的時間，成績，都寫在媽媽的臉上，這麼多年來，從沒見過她因為我而笑得那麼欣慰，不是因為我賺了幾多幾多錢，或走在街上會掀起幾多幾多的蜂擁，媽媽見我用心，徹頭徹尾的把手頭上的工作完成，那種喜悅，無法言喻。

跳舞
「呀…呀…」拍《千機變II》時，在埋位拍戲之前做熱身運動，一拉起筋便痛得怪叫起來。

助手坐在一旁，喝咖啡，問：「你以前唔係跳芭蕾舞咩？拉兩筋都痛？跳舞都要拉筋……」

三歲開始學芭蕾舞，十三歲便停了，如果沒有停過，今日的舞跳得如何還是其次，氣質起碼有張天愛的境界。

助手伸了個懶腰，又說：「咁三分鐘熱度你！」

開竅
都係貪睡懶動累事，從來對每一件事都熱度十足，惜勁度則隨時間每況愈下，回家看到大床，甚麼興趣都拋到十萬九千里外，Twins之後，我可以變得在車上睡十五分鐘便又精神奕奕開工、擔起一家事無大小的經濟責任。人總有開竅的時候，自己想得通，也得靠身邊智者指點影響，出道五、六年，都係時候好友逐個數了。（待續）